په دایکنډي ولایت کې د ۱۰ مېلیونه افغانیو په لګښت ۶ بابه ښوونځي ورغول شول

د پوهنې وزارت مسئولین وايي، چې په دې وروستیو کې د دایکنډي ولایت په اړوندو کې ۶ بابه ښوونځي جوړ او د پوهنې چارواکو، د سیمه‌ییزو ادارو مسئولینو، د خلکو او مرستندویه ادارو د استازو په حضور کې افتتاح او ګټې اخیستنې ته وسپارل شول.
ښوونځي: د خدیر ولسوالۍ په کومور، د کیتي ولسوالۍ په رویان او تمران، د کجران ولسوالۍ په زرد ګلان، د پاتو ولسوالۍ په سنګ مزار او ذکور محمدیه کې جوړ شوي دي، چې هر یو یې شپږ درسي ټولګي، اداري خونې او ټولې تعلیمي اسانتیاوې لري او د پوهنې وزارت سره د یوې همکارې ادارې په ملاتړ سره جوړ شوي دي.
د چارواکو په وینا، د دې ښوونځیو په جوړولو سره، د یادو ولسوالیو د ماشومانو لپاره اړینې تعلیمي اسانتیاوې برابرې شوې، چې د پورته ذکر شویو سیمو خلک یې خوښ کړي دي.