د ننګرهار دهډې فارم کمپ لېسه کې زده کوونکي عامه کتابتون جوړوي
د پوهنې وزارت ننګرهار: په هغه ِغونډه کې چې د بهسود ولسوالي د هډي فارم کمپ لېسي د دولسم ټولګیو دفارغه شویو زده کوونکو په ویاړ جوړه شوي وه، د یادې لېسې زده کوونکو او ادارې په دې ښوونځي کې د یو عامه کتابتون جوړولو تابیا وکړه.
د ننګرهار د پوهنې ریس حسیب الله شینواري د هډې کمپ سیمې له ولسي شورا او خلکو مننه وکړه چې تل یې د دې لېسې سره مرسته کړې، هغه وویل پدې لېسه کې د لېسې د مدیر په نوښت او د ولسونو او پوهنپالو په مالي ملاتړ جوړې شوې خامې کوټې ورته د درې پوړیزي ودانی څخه ډیر ارزښت لري، چې د پردیو په پیسو جوړیږي، موږ باید له لږو امکاناتو ډیره ګټه واخلو او په خپلو مټو خپل وطن اباد کړو.
پوهنې ریس د زده کوونکو ستاینه وکړه، چې په خپل ښوونځي کې د یو عامه کتابتون د جوړیدو تابیا یې کړې او ژمنه یې وکړه چې ژر به د کتابتون لپاره نور تجهیزات ورته اماده کړي، پوهنې ریس د لېسې د امر مولوی عبدالبصیر حقاني د هغه کړنو ستاینه وکړه، چې له امله یې د دې لېسې د زده کوونکو ډیری ستونزې حل شوي.
د هډې فارم کمپ لېسې زده کوونکو تر دا مهاله د کتابتون لپاره لسګونه کتابونه راغوڼډ کړي او د زده کوونکو په وینا چې دا کمپاین به دوامداره ترسره کوي.
سږ کال د هډې فارم کمپ لېسې څخه ۵۰ تنه نجونې او ۵۳ تنه هلکان له دولسم ټولګي فارغ شو.
