په افغانستان کې د جاپان سفیر د پوهنې وزارت له سرپرست وزیر سره وکتل
په افغانستان کې د جاپان هیواد سفیر ښاغلي اوکاډا تاکاشا ( Okada Takashi) او د سفارت لومړي سکرتر ښاغلي هیرو یوکي کینیډا (Hiroyuki Kaneda) د پوهنې وزارت له سرپرست وزیر محترم شیخ مولوي نورالله منیر سره وکتل .
په یاده لیدنه کې د جاپان سفیر له محترم وزیر صاحب سره د وروستیو زلزلو او سیلابونو له امله غمرازي شریکه کړه او زیاته یې کړه، جاپان به د یو متحد هیواد په توګه هیڅکله افغانستان په سختو حالاتو کې یوازې پرېنږدي.د نوموړي په وینا، افغانستان د آسیا په زړه کې پروت هیواد دی، د افغانستان ثبات او پرمختګ د سیمې د ټولو هیوادونو په ګټه دی، جاپان هیواد ټینګه اراده لري چې له افغانستان سره په تعلیمي ډګر کې مرسته وکړي.
ورپسې د پوهنې محترم وزیر صاحب لومړی راغلي هیئت ته ښه راغلاست ووایه، له افغانستان سره د جاپان هیواد د بشري مرستو له امله یې له یاد هیئت څخه مننه وکړه او زیاته یې کړه، چې تعلیم د هر افغان وګړي حق دی او اسلامي امارت د خپلو نړیوالو متحدینو په مرسته هڅه کوي، چې خپلو هیوادوالو ته په تعلیمي ډګر کې معیاري، متوازن او عادلانه خدمات وړاندې کړي او په دې برخه کې نړیواله ټولنه هم مسئولیت لري، چې له څلوېښت کلن بحران څخه راوتلي افغانستان ته د همکاري او دوستي لاس وغزوي.
