د ترکیې د نړیوال خیریه بنسټ (I.H.H) مرستيال د پوهنې وزارت له سرپرست وزیر سره وکتل
د ترکیې د نړیوال خیریه بنسټ (I.H.H) مرستیال ښاغلي یعوذ، د یاد بنسټ د دیپلوماسي د څانګې مسئول ښاغلي عبدالله او د افغانستان لپاره د یاد بنسټ مسئول ښاغلي جنید، د پوهنې وزارت له سرپرست وزیر محترم شیخ مولوي نورالله منیر سره وکتل.
په یاده لیدنه کې ښاغلي یعوذ لومړی د خپل بنسټ د فعالیتونو په هکله تفصیلي خبرې وکړې او ویې ویل، یاد بنسټ له دیرشو کلونو راهیسې د نړۍ په ۱۳۰ هیوادونو کې خیریه فعالیتونه سرته رسوي، په کابل ښار کې د یتیمانو لپاره د یو تعلیمي کمپلیکس د جوړولو اراده لري، چې د ځینو اداري مرحلو له بشپړېدلو وروسته به ورباندې عملا کار پيل شي.د هیواد له څلور زره ثبت شویو یتیمو ماشومانو سره هره میاشت ځانګړی مقدار مالي مرسته کوي او په نږدې راتلونکې کې به د ثبت شویو یتیمانو شمیر شل زره تنو ته ورسوي. د نوموړي په وینا، یاد بنسټ په افغانستان کې د ښوونځیو دودانیو د جوړولوپه برخه کې هم ځانګړي پلانونه لري.
ورپسې د پوهنې محترم وزیر صاحب لومړی راغليو میلمنو ته ښه راغلاست ووایه، د دوی د بشري او تعلیمي مرستو له امله یې ورڅخه مننه وکړه او ژمنه یې وکړه، چې دپوهنې وزارت به د یاد بنسټ د ثبت او راجسټریشن د اداري مراحلو په بشپړولو او یاد بنسټ ته دهرډول اسانتیاوو د برابرولو په برخه کې پوره هڅه او هاند کوي.
