د نصاب او ښوونکو دمسلکي پراختیا لوی رئیس د پکتیکا ولایت د پوهنې له رئیس سره وکتل
دنصاب او ښوونکو دمسلکي پراختیا لوی رئیس مولوي عبدالحکیم همت اخندزداه په داسې حال کې چې د ښوونکو د مسلکي پراختیا رئیس مولوي سمیع الحق حماس هم حضور له درلود، دپکتیکا ولایت د پوهنې له رئیس مولوي میرزا علي خان سعید او مل پلاوي سره وکتل.
د مجلس په پیل کې لومړی ښاغلي همت صاحب راغلیو میلمنو ته ښه راغلاست ووایه او بیا یې دخپل اړوند ریاست د فعالیتونو په هکله لنډمعلومات وړاندې کړل.
د پکتیکا ولایت د پوهنې رئیس لومړی د یاد ولایت په ښوونیز بهیر رڼا واچوله او د دارالمعلمینونو د تدریسي او اداري چارو په هکله یې تفصیلې خبرې وکړې. نوموړي زیاته کړه چې د پوهنې وزارت باید خپلو امکاناتو ته په پام سره د ښوونکو د وړتیاوو د لوړولو په برخه کې منظم ورکشاپونه دایر کړي.
ښاغلي همت د خپلو خبرو په ترڅ کې د ښوونکو د ظرفیت لوړول د زده کړې د معیار او کیفیت په لوړولو کې یوه مهمه چاره وبلله او ژمنه یې وکړه چې په نږدې راتلونکي کې د ښوونکو د مسلکي پراختیا زیات پروګرامونه په پام کې نیول شویدي چې دپوهنې وزارت د خپلو امکاناتو او مرستندویه موسساتو او بنسټونو په مټ به په ټول افغانستان کې تطبیق شي.
