د پوهنې وزارت او ازموینو د ملي ادارې د استازو ترمنځ ناسته ترسره شوه
د پوهنې وزارت او ازموینو د ملي ادارې د استازو ترمنځ د یادې ادارې د هغه وړاندېز په اړه چې غواړي موقتا د نصاب او ښوونکو د مسلکي پراختیا د لوی ریاست اړوندو ودانیو ته خپل مرکزي دفتر را ولېږدوي، ناسته ترسره شوه.
په یاده ناسته کې د پوهنې وزارت په استازیتوب لاندې مرکزي رئیسانو برخه اخیستې وه:
۱- مولوي عبدالحکیم همت اخندزاده، د نصاب او مسلکي پراختیا لوی رئیس.
۲- مفتي شفیع الله منصور، د اسنادو، هدایاتو او احکامو د تعقیب رئیس.
۳- مولوي سمیع الحق حماس، د ښوونکو د مسلکي پراختیا رئیس.
۴- مولوي شمس الرحمن حماس، د بدیلو زدکړو رئیس.
د ازموینو د ملي ادارې په استازیتوب د یادې ادارې مرستیال مولوي رحیم الله حقاني او ځینو نورو رئیسانو برخه درلوده.
غونډه د قرآن عظیم الشان د څو مبارکو ایاتونو په تلاوت سره پیل شوه، وروسته د پوهنې وزارت د استازو له لوري راغلیو میلمنو ته ښه راغلاست وویل شو. ورپسې د ازموینو د ملي ادارې استازي خپل وړاندیز د پوهنې وزارت له استازو سره شریک کړ. دوی وویل چې د ازموینو د ملي ادارې مسئولین غواړي چې خپل مرکزي دفتر د پوهنې وزارت د نصاب او مسلکي پراختیا ریاست اړوندو ودانیو ته را ولېږدوي.
د پوهنې وزارت استازو ورته ډاډ ورکړ چې دوی به لومړی د خپلو اړوندو ودانیو ارزونه وکړي او بیا به په راتلونکو ناستو کې د وزارت له مقام سره په هم غږي د یاد وړاندېز په هکله عملي اجراآت تر سره کړي.
