د لغمان له پوهنې ریاست څخه خبرونه
ابرار موسسې د یونیسف ادارې په مالي مرسته او د لغمان ولایت د پوهنې ریاست په همغږۍ د ازادې سیالۍ لړۍ په لاره واچوله او له ۱۵۶ تنو څخه یې ازموینه واخیسته.
د مسوولینو په وينا، په پام كې ده، چې د دغه ولايت په الينګار ولسوالۍ كې د يادې موسسې په ملاتړ د سيمه ييزو او چټکو ښوونيزو ټولګيو د تدريس په موخه ۳۷ تنه د ښوونکي په توګه وګمارل شي.
د لغمان د مهترلام ښار د تعلیمي څارنې غړو د دغه ښار د هلکانو د منځني تجربوي ښوونځي له اداري او تدریسي چارو څخه څارنه وکړه.
د څارنې غړو د زده کوونکو د علمي کچې د ارزونې پر مهال د دغه ښوونځي له استادانو وغوښتل چې د درسي کيفيت په برخه کې جدي پاملرنه وکړي.
د لغمان ولایت د قرغیو ولسوالۍ د تعلیمي څارنې غړو د سلطان ویس بابا او لوکینګ د لومړنيو ښوونځيو اداري او تدریسي چارې وڅېړلې او د یادو ښوونځیو مدیرانو او ښوونکو ته یې د ستونزو د حل په موخه لازمې لارښوونې وکړې.
د لغمان ولايت د پوهنې رئيس مولوي شاه جهان ساجد د دغه رياست له کارکوونکو سره د ليدنې پر مهال له هغوى وغوښتل، چې د پوهنې وزارت د دعوت او ارشاد رياست له لارښوونو سره سم په درسونو او نورو ديني پروګرامونو کې ګډون وکړي او خپلې دندې په ښه شکل سره ترسره کړي.
د لغمان ولایت د قرغیو ولسوالۍ د تعلیمي څارنې غړو د چهارباغ، ګردي کڅ او د تکه کلي د ښوونځیو او د زده کوونکو د تدریسي، اداري، ښوونیزو چارو او درسي پلانونو څخه څارنه وکړه او ټولو زده کوونکو ته یې د کتابچو او ښوونیزو توکو مرسته وکړه.
