له ولایتونو څخه د پوهنې لنډ خبرونه
جوزجان
د پوهنې وزارت د درۍ کلن ملي پلان د مسودې په اړه مشورتي غونډه، د جوزجان ولایت د پوهنې رئیس الحاج مولوي محمد طاهر جواد او د یاد ریاست د یو شمېر مسئولینو، مدیرانو او کارکوونکو په حضور کې جوړه شوه.
د یادې غونډې موخه، د پوهنې وزارت په درۍ کلن ملي پلان کې د هغه ولایت د پوهنې د وضعیت هر اړخیز تحلیل ؤ.
بیا هم له یاد ولایت څخه:
د جوزجان ولايت پوهنې رئیس د یاد رياست دانجنیرۍ له ټېم سره، په دغه ولايت کې د ترناب ازبکيه او شيخ آباد ښوونځيو د جوړولو کار وڅيړه او د کار د لاښه والي لپاره یې د لوړ کیفیت توکو د استعمال په اړه لازمې سپارښتنې وکړې.
همدارنګه:
د جوزجان ولایت پوهنې رئیس د یماق تنکه او نفت فابریکه ښوونځیو له اداري او تدریسي چارو څخه لیدنه وکړه او د زده کوونکو د زده کړې طرز او د استادانو د تدریس طریقې یې له نیږدې وارزولې.
نیمروز
د نيمروز ولايت پوهنې رئیس مولوي ګل احمد حقاني، د یاد ولايت د ښوونځيو فوټبال لوبډلو د پايلو اعلان په مراسمو کې، چې د سيستان په لېسه کې جوړ شوي ؤ، ګډون وکړ.
په ورته مهال نوموړي د اسلام له نظره د سپورت په ګټو او اهمیت خبرې وکړې.
تخار
د تخار ولایت پوهنې رئیس الحاج مولوي حزب الله مبشر، د یاد ریاست له کاري څانګو څخه لیدنه وکړه او د چارو د لا ښه والي په موخه یې لازمې لارښوونې وکړې.
دغه راز نوموړي له مسئولینو او کارکوونکو غوښتل، تر څو د پوهنې وزارت کړنلاره مراعات او له زده کوونکو سره ښه چلند وکړي.
