د پوهنې وزارت د احصائیې او EMIS رئیس د بغلان ولایت له پوهنې رئیس سره وکتل
د پوهنې وزارت د احصائیې او EMIS رئیس الحاج مولوي بسم الله نعماني چې د رسمي چارو په موخه بغلان ولایت ته تللی، د یاد ولایت د پوهنې له رئیس الحاج مولوي محمد نور عزیزي سره په کتنه کې، د پوهنې اړوند پلانونو، پرمختګونو او د پوهنیزو ستونزو د هواري په موخه، یو له بل سره مفصلې خبرې وکړې.
د پوهنې وزارت د احصائیې او EMIS رئیس په مشرۍ پلاوي، د پوهنې د معیاري مېتودونو په اړه د مرکز او ولسوالیو د پوهنې ریاست مسئولینو وړتیاوو لوړولو په موخه یو روزنیز سیمینار هم دایر کړ.
د سیمینار په پرانیستونکې غونډه کې د پلاوي مشر د کاري پلانونو په ترتیب او چمتو کولو کې د ادارو د سمو احصائیو او ارقامو شتون اړین وباله او له ګډون والو یې وغوښتل چې د سیمینار له محتوا څخه اعظمي ګټه پورته کړي.
همدا راز نوموړي د ښوونې او روزنې ارزښت او د ښوونکو مسئولیتونو ته په اشارې سره وویل: پوهنه په ټولنه کې د یوې زانګو حیثیت لري، څوک چې په دې زانګو کې روزل شوي دي، کولای شي د هېواد پرمختګ لپاره هلې ځلې او خدمتونه ترسره کړي.
نوموړي زیاته کړه: لکه څنګه چې یوه ټولنه ښوونې او روزنې ته اړتیا لري، نو دا د ښوونکو او استادانو دنده ده چې د هېواد بچیانو په وړاندې خپل اسلامي او ملي مسئولیت اداء کړي.
ورپسې د بغلان ولایت پوهنې رئیس د پوهنې وزارت د احصائیې او EMIS د رئیس له راتګ خوښي څرګنده کړه او د یاد ولایت د احصائیې له رئیس څخه یې غوښتنه وکړه، تر څو د پوهنې کارکوونکو وړتیاوو لوړولو په موخه، ځانګړي ورکشاپونه او سیمینارونه جوړ کړي.
