په بلخ ولایت کې د ۱۰۰ تنو علماوو او حافظانو پرتمینه فراغت غونډه ترسره شوه
د بلخ ولایت «امام مسلم دارالعلوم» له لویې دورې څخه ۸۵ تنه علماء کرام او ۱۵ تنه د قرآن کریم له حفظ دورې فارغ او د یو لړ پرتمینو مراسمو په ترڅ کې یې فراغت غونډه ترسره شوه.
په یادو مراسمو کې د دغه ولایت د پوهنې، علماوو شورا، محکمې رئيسانو، علماوو او د سيمه ييزو ادارو يو شمېر مسئولينو ګډون درلود.
د بلخ ولایات پوهنې رئیس الحاج مولوي عبدالجلیل شهید خېل او نورو ویناوالو هر یو د دیني علومو د زده کړې پر اهمیت او په ټولنه کې د اسلامي احکامو د پلي کولو په اړه مفصلې خبرې وکړې.
همدارنګه نوموړي فارغانو او د هغوی کورنیو ته د مبارکۍ ترڅنګ، له دوی وغوښتل، تر څو د ټولنې په وړاندې خپل دیني او ملي مسئولیتونه په ښه توګه ترسره کړي.
له بلې خوا يو شمېر فارغانو د نورو په استازيتوب په ښوونیزه دوره کې د خپلو استادانو له هلو ځلو خوښي څرګنده او ژمنه يې وکړه، چې د دیني علومو دزده کړې په برخه کې به د هېواد د راتلونکو نسلونو لپاره خپل ديني او ملي رسالت ترسره کړي.
غونډه پر ممتازو طلابو د ستاینلیکونو او ډالیو په وېشلو سره پای ته ورسېده.
