له ځینو ولایتونو څخه د پوهنې خبرونو لنډیز
غزني
د غزني ولایت د پوهنې ریاست یو شمېر اداري کارکوونکي او د ښوونیزې څارنې پخواني غړي د یاد ریاست د عمومي زده کړو په پروګرام کې د علمي او مسلکي غړو په توګه وګمارل شول او د پوهنې رئیس الحاج مولوي میر نصیر احمد حسیني له لوري خپلو همکارانو ته ور وپېژندل شول.
سرپل او کندوز
د سرپل او کندز ولایتونو د پوهنې ریاست مسئولین وايي: د یو منظم پروګرام په ترڅ کې د همکارو بنسټونو په مرسته زرګونه ټوکه درسي کتابونه چې د پوهنې وزارت له لوري د سرپل او کندوز ولایتونو د پوهنې ریاستونو ته استول شوي وو، د یادو ولایتونو د مرکز او ولسوالیو په ښوونځیو باندې ووېشل شول.
پروان
د پروان ولايت د اطلاعاتو او فرهنګ رياست، د یاد ولايت د پوهنې رياست په همکارۍ په سياه ګرد او شينوارو ولسواليو کې د سلګونو ځوانانو ترمنځ «د کتاب لوستلو سيالي» په لاره واچوله.
د یاد ولايت د اطلاعاتو او فرهنګ ریاست د ګرځندوی څانګې آمر عتيق الله صافي د دغه سياليو د پيلولو اساسي موخه، د ځوانانو تر منځ د کتاب لوستلو د فرهنګ دودول، انګېزه ورکول او د هغوی د عملي کچې لوړول وبلل.
تخار
د پسرلي موسم د رارسېدو په درشل کې د تخار ولایت پوهنې ریاست مسئولینو، د یاد ولایت د پوهنې ریاست په انګړ کې د څو زینتي نیالګیو په اېښودلو سره د نیالګیو کینولو کمپاین پیل کړ او له مسئولینو څخه یې وغوښتل، تر څو د نيالګيو په اېښودلو سره د چاپېريال په سمسورتیا او آبادۍ کې خپله ونډه واخلي.
