د هېواد په یو شمېر ولایتونو کې د ا.ا.ا. له م.جاهدينو څخه د هغوی د سويې د تثبيت آزموینه واخیستل شوه
د پوهنې وزارت د پالیسۍ له مخې، د هېواد بچيانو لپاره د متوازنو ښوونیزو خدمتونو د وړاندې کولو په تړاو، د ياد وزارت د اسلامي زده کړو معينيت د يوې ځانګړې کړنلارې له مخې، په یو شمېر ولایتونو کې له هغو م.جاهدينواو ځوانانو څخه کوم چې د اشغال ګرو په وړاندې په ج.هادي فعاليتونو کې د مصرفيتونو له مخې د خپلو درسونو څخه پاتې وو، د هغوی د سويې د تثبيت آزموينه واخيستل شوه.
په ياده آزموينه کې له ميدان وردګ ولايت څخه ٦٠٠ تنو، له کندهار ولايت څخه ٢٥٠٠ تنو، له بلخ ولايت څخه ١٨٠٠ تنو، له فراه ولايت څخه ١٥٠٠ تنو او له غزني ولايت څخه ١٢١٠ تنو برخه اخيستې وه.
دغه آزموينه په جلا جلا توګه په اړوندو ولايتونو کې د مسئولو پلاويو له لوري په داسې حال کې واخيستل شوه، چې په کې د يادو ولايتونو د پوهنې د رئيسانو سربېره د مدارسو او دارالعلومونو يو شمېر علماء کرامو او استادانو هم حضور درلود.
د يادو ولايتونو د پوهنې رئيسانو او نورو ويناوالو د دغو آزموينو د څارنې پرمهال، په ټولنه کې د علم او پوهې پر اهميت خبرې وکړې او ځوانان يې ديني او عصري زده کړو ته وهڅول.
همدارنګه ګډون والو ته په آزموینه کې د بشپړې روڼتيا ډاډ ورکړل شو.
د يادونې وړ ده، چې د آزموينې د پايلو له ارزونې وروسته به نوماندان د خپلو زده کړو د دوام په موخه، د هغوی د سويې سره سم د ښوونځيو په بېلابېلو ټولګيو کې شامل شي.
