د ولایتونو له پوهنې ډګره څو لنډ خبرونه
غزني
د غزني ولایت د قرباغ ولسوالۍ یو شمېر دیني علماوو او قومي مشرانو، د یاد ولایت له پوهنې رئیس الحاج مولوي میر نصیر احمد حسیني سره په کتنه کې، د خپلو ښوونځیو ستونزې او وړاندیزونه شریک او د همکارۍ غوښتنه یې وکړه.
هرات
د هرات ولایت د ښوونځیو د لابراتوارونو د لارښونې غونډه، د یاد ولایت د پوهنې رئیس او نورو مسئولینو په ګډون په ښوونځیو کې د ۱۵۰ قلمه لابراتواري موادو د کارولو د څرنګوالي او لارښوونې په تړاو جوړه شوه.
فراه
د پوهنې وزارت د ښوونکو د نصاب او مسلکي پراختیا د لوی ریاست روزونکو، د فراه ولایت له پوهنې رئیس الحاج مولوي اختر محمد زعیم سره د لیدنې پر مهال، د ۲۰۹ تنو ښوونکو د وړتیا لوړونې ۱۲ ورځنی سیمینار پیل کړ.
بلخ
د بلخ ولایت پوهنې رئیس الحاج مولوي عبدالجلیل شهید خېل د بلخ ولایت د ولسوالیو د ښوونیزو مرکزونو له اداري او تدریسي چارو څخه د څارنې او کتنې په موخه، د شولګرې او دهدادي ولسوالیو ته سفرونه وکړل، د یو شمېر مدارسو او ښوونځیو له ښوونیزو چارو یې څارنه وکړه.
غور
د غور ولایت پوهنې ریاست د همکارو ادارو له مسئولینو سره د همغږۍ غونډه، د یاد ولایت د پوهنې رئیس الحاج شیخ حفیظ الله محفوظ په مشرۍ جوړه شوه.
د یاد ولايت د پوهنې رئيس له هغوى وغوښتل، تر څو د پوهنيزو بنسټونو د تمويل او تجهيز ترڅنګ، په غور ولايت کې د ښوونځيو د ښوونکو د وړتیا لوړولو پروګرامونه پيل کړي.
