د ځينو ولایتونو پوهنې کړنو ته لنډه کتنه
له څو ولایتونو:
د پوهنې وزارت له لوري د همکارو بنسټونو په ملاتړ، د هرات، زابل، کاپیسا، پروان، لوګر او میدان وردګ ولایتونو د مدارسو او ښوونځیو د یو زره ۲۶۹ ښوونکو او اداري کارکوونکو لپاره د وړتیا لوړونې میتودیکي سیمینارونه جوړ شول.
پکتیا
د پکتيا ولايت پوهنې رياست د مدارسو او ښوونځيو د ۳ زره زده کوونکو ترمنځ د ا.مارت پېژندنې سيالۍ پيل کړې.
د یاد ولايت پوهنې رئيس الحاج مولوي عبدالقيوم فاروقي وويل، د دغو سیالیو څخه يې اساسي موخه، د ا.ا.ا. د نظام له کړنو او دندو څخه د ځوانانو د پوهاوي د کچې لوړول دي.
خوست
د خوست ولايت پوهنې رئيس مولوي فيض الله جمال حقاني، د یاد ولايت د شهيد مطيع الله لېسې له درسي کړنو څخه د څارنې ترڅنګ، د خلکو په مالي ملاتړ د کمپيوټر يو باب ټولګی هم پرانیست.
لوګر
د لوګر ولایت پوهنې ریاست مسئولین وايي: په پوهنې ریاست کې یې پستي خدمتونه فعال کړي دي او له دې وروسته به د زده کوونکو شهادتنامې او اداري اسناد د مخابراتو او معلوماتي ټکنالوژۍ وزارت پسته خونې له لارې اړوندو ولایتونو ته انتقالېږي.
هلمند
د پوهنې د یو همکار بنسټ په ملاتړ د هلمند ولایت پوهنې ریاست، د ښوونځیو د زده کوونکو د قرطاسیې سهمیه د یاد ولایت د ولسوالیو پوهنې آمریتونو ته تسلیم کړه او په پام کې ده، چې د دغه ولایت د ښوونځیو زده کوونکو ته ووېشل شي.
