په سرپل ولایت کې د ۴۵ زره امریکایي ډالرو په ارزښت د یو منځني ښوونځي د ودانۍ جوړېدو چارې پیل شوې
د پوهنې وزارت د چارواکو په وينا، د سرپل ولایت سانچارک ولسوالۍ اړوند په اوقاف کلي کې د يو باب منځني ښوونځي د بنسټ ډبره کېښودل شوه. په یادو مراسمو کې د پوهنې او نورو سيمه ييزو ادارو پر مسئولينو سربېره، علماوو او د سيمې د خلکو استازو ګډون کړى و. د دغه ښوونځی ودانۍ چې د یو همکار بنسټ په مالي مرسته د ۴۵ زره امریکایي ډالرو په لګښت سره جوړېږي، په یو پوړ کې به ۶ درسي ټولګي، یوه اداري خونه او د تدریس ټول اړین توکي ولري. د یاد ښوونځي د بنسټ په مراسمو کې د سرپل ولایت پوهنې رئیس مولوي محمد رحماني د علم او پوهې اهمیت ته په اشارې سره وویل: دا د علماءکرامو مشوره وه، چې زموږ اولادونه دې زده کړې وکړي، خو اوس الحمدلله دغه ارمان پوره شوي دي. د سيمې خلکو هم د پوهنې رياست له پلانونو څخه ملاتړ وکړ او په خپل کلي کې يې د ښوونځي په جوړېدو خوښي څرګنده کړه.
