په نورستان ولایت کې د ۲۹ مېلیونه افغانیو په لګښت د ۱۲ بابه ښوونځیو بیارغونې چارې پیل شوې
په هغه غونډه کې چې د نورستان ولایت والي الحاج قاري زین العابدین عابد، پوهنې رئیس الحاج مولوي تاج محمد مطمئن، مسؤلینو، د یو شمېر ولایتي ادارو چارواکو، علماوو او قومي مخورو پکې حضور درلود؛ د یاد ولایت په مرکز او بېلابېلو ولسوالیو کې د ۱۲ بابه ښوونځیو د احاطوي دېوالونو رغولو او ترمیم چارې پیل شوې.
د دغه ولایت پوهنې رئیس مېلمنو ته د ښه راغلاست په ترڅ کې، د پوهنې ریاست د لاسته راوړنو په اړه لنډ راپور وړاندې کړ.
ورپسې د نورستان والي هم د پوهنې په بهیر کې د ښوونیزو مرکزونو د اهمیت په اړه خبرې وکړې او د پوهنې وزارت د پروګرامونو د پلي کېدلو په برخه کې یې د همکارۍ د دوام ډاډ ورکړ.
په دې کتنه کې يو شمېر علماءکرامو او د خلکو استازو هم په یاد ولايت کې د ښوونيزو بنسټونو د پراختيا په برخه کې د پوهنې وزارت د رهبرۍ د پاملرنې يادونه وکړه او د پوهنې له رياست سره يې د هراړخیزو همکاریو ژمنه وکړه.
د ویلو ده چې د یادو پروژو مالي لګښتونه د پوهنې په برخه کې د یوې مرسته کوونکې ادارې لخوا تمویلېږي.
