د هېواد په سړو سیمو کې د ۱۴۴۶/۱۴۰۳ کال د کلنۍ آزموینې په تړاو د پوهنې وزارت خبرتیا!
۱۴۴۶/۱۴۰۳ ښوونیز کال د هېواد په سړو سیمو کې د پای ته رسېدو په درشل کې دی؛ د دې لپاره چې کلنۍ آزموینې په ښه ترتیب ترسره شي، اړینه بولو، ترڅو د اساسي او ثانوي د آزموینې د لایحې د پوره رعایت لپاره لاندې مواردو ته په جدي توګه پاملرنه وشي:
• له لومړي تر درېیم ټولګي پورې کلنۍ آزموینه د ۱۴۰۳ کال د لړم میاشتې له ۲۶مې نېټې څخه چې د ۱۴۴۶ کال د جمادي الاولې ۱۴ مې نېټې سره سمون خوري پيل او د لړم میاشتې په ۳۰ مه چې د جمادي الاولې ۱۸مې نېټې سره سمون خوري، پای ته رسېږي.
• له څلورم تر دولسم ټولګي پورې کلنۍ آزموینه د ۱۴۰۳ کال دلیندۍ میاشتې له (۱) نېټې څخه چې د ۱۴۴۶ کال د جمادي الاولې له ۱۹ مې نېټې سره سمون خوري پیل او لیندۍ میاشتې په ۱۵مه چې د جمادي الثاني ۳ مې نېټې خوري پای ته رسېږي.
• په آزموینه کې د ګډون لپاره د لومړي ټولګي د زده کوونکو د حاضرۍ ضوابط ۵۰ سلنه، له دویم نه تر شپږم تولګي پورې ۷۰ سلنه او له اووم نه تر دولسم ټولګي پورې ۷۵ سلنه اړینه ده.
• د زده کوونکو لپاره د معقول عذر او قانوني تصدیق په لرلو سره د حاضرۍ ضوابط له لومړي تر شپږم ټولګي پورې ۵۰ سلنه او له اووم څخه تر دولسم تولګي پورې ۵۵ سلنه اړین بلل کېږي.
• د زده کوونکو ګډون د تعین شوې سلنې پر اساس په آزموینه کې اصلي معیار ګڼل کېږي، په دې توګه لارښوونه کېږي، تر څو ټاکل شوې سلنې په جدي توګه رعایت شي او په دې برخه کې د عرایضو او وړاندیزونو له وړاندې کولو څخه دې ډډه وشي.
• د ښوونکو د روزنې او مسلکي پراختیا علمي غړي دې د آزموینې له پروسې بشپړه څارنه وکړي او خپل توحیدي راپور دې د اړونده ولایتي ریاستونو له لارې ښوونې او روزنې معینیت سره د آزموینې د پای ته رسېدو څخه وروسته د لسو ورځو په ترڅ کې شریک کړي.
• د ښوونځيو آمرین او مدیران دې زده کوونکو ته لازم امکانات او مناسب چاپېریال رامنځته کړي، ترڅو زده کوونکي په پوره ډاډ سره په آزموینه کې ګډون وکړي.
• په آزموینه کې دې د اصولو او مقرراتو په پام کې نیولو سره روڼتیا او عدالت پلی کړای شي.
په دې توګه د پوهنې ولایتي محترمو رئیسانو ته لارښوونه کېږي، تر څو د آزموینې په بهیر کې د اړوندو اصولو، لوایحو او پورتنیو لارښوونو سره سم لازم اجراآت ترسره کړي.
والسلام
الحاج مولوي حبیب الله آغا
د پوهنې وزارت سرپرست
