میدان وردګ ولایت کې څو بابه ښوونځي په لابراتوارونو سمبال شول
د میدان وردګ ولایت سید آباد ولسوالۍ اونخي کلي کې د میلاد النبي (صلی الله علیه وسلم) عالي لېسه د ۱۶۷ زره۸۰۰ افغانیو په لګښت پر لابراتواري موادو او تجهیزاتو سمبال شوه.
په دې تجهیزاتو کې ۱۲ پایې لابراتواري مېزونه، ۱۴ پایې څوکۍ، ۲ المارۍ، ۸۰ قلمه کیمیاوي مواد، ۵۸ قلمه د فزیک تجربوي مواد، ۲۴ قلمه د بیولوژي ماډلونه، ۸۴ ټوکه لارښود کتابونه، ۱۳۰ چارټونه او ۶ د ریاضي کڅوړې شاملې دي.
د میدان وردګ ولایت پوهنې رئیس محترم مولوي محمد عثمان حریت د موضوع په اړه وویل چې؛ د یاد اقدام اساسي موخه، د ساینس په برخه کې د عملي زدهکړو ارایه کول دي؛ تر څو د زدهکوونکو د علمي پوهې کچې لوړولو لپاره معیاري او باکیفیته تدریس ته لاره هواره شي.
همدارنګه مسئولینو زیاته کړه چې د میدان ښار مرکز رستم خېل ښوونځي او سید آباد ولسوالۍ کې د کفتان تاج محمد خان عالي لېسې لابراتوارونه هم په ورته تجهیزاتو او موادو سره سمبال شوي دي.
