د ځینو ولایتونو پوهنې خبرونو ته لنډه کتنه
دایکنډي
د دایکنډي ولایت پوهنې رئیس محترم الحاج مولوي رحمت الله قندیلي د یاد ولایت میرامور ولسوالۍ د ښوونکو او ښوونځیو مسئولینو له علمي او مېتودیکي سیمینار څخه لیدنه او څارنه وکړه.
جوزجان
د جوزجان ولایت پوهنې رئیس محترم الحاج مولوي لعل محمد راشد د شبرغان ښار ابن یمین عالي لېسې له چارواکو او ښوونکو سره کاري او مشورتي غونډه وکړه.
همدارنګه نوموړي د یادې ادارې د مهمو څانګو چارواکو لپاره د "بیاکتنې، اسانتیاوو، لارښودونو پلي کولو او ستونزو حل" تر سرلیک لاندې ورکشاپ څخه هم څارنه وکړه.
غزني
د غزني ولایت پوهنې رئیس محترم الحاج مولوي میر نصیر احمد حسیني د یاد ولایت د ناور ولسوالۍ وارکلاخ کلي له یو شمېر علماءکرامو، استازو او بانفوذه اشخاصو سره مشورتي غونډه وکړه او په همدې کلي کې یې د ښوونځي جوړولو لپاره د مالي ملاتړ غوښتنه وکړه.
په پلان کې ده چې ډېر ژر به په یاد کلي کې د ۸ جرېبه ځمکې په ساحه کې د ښوونځي دوه پوړیزه ودانۍ بنسټ ډبره کېښودل شي، چې شپږ درسي خونې او نور اړین ملحقات به ولري.
