د پوهنې وزارت د تدریساتو کمېسیون غونډه د ښوونې او روزنې محترم معین په مشرۍ ترسره شوه
د پوهنې وزارت د ښوونې او روزنې محترم معین شیخ عبدالمالک حقاني په مشرۍ د تدریساتو کمېسیون نوبتي غونډه د یاد وزارت په مرکزي دفتر کې ترسره شوه.
په دغه غونډه کې د کمېسیون غړو او د وزارت د یو شمېر مرکزي ریاستونو استازو هم ګډون درلود.
غونډه د قرآنکریم د څو مبارکو آیتونو په تلاوت سره پیل شوه.
ورپسې د غونډې د آجنډا له مفرداتو سره سم د تدریساتو، درسي نصاب، ښوونکو روزنې او نورو اړوندو موضوعاتو په اړه هر اړخیز بحثونه ترسره شول.
دغه راز ګډونوالو د موضوعاتو په اړه خپل نظریات او وړاندیزونه د کمېسیون له غړو سره مطرح او د مراجعینو د ستونزو او غوښتنو په اړه هم مفصل بحثونه وشول، چې په پایله کې ۲۶ مهمې پرېکړې ترسره او د نورو اجراآتو لپاره اړوندو ریاستونو او مسئولینو ته واستول شوې.
غونډه د پوهنیزنظام لا پرمختګ او بریا په مبارکې دعایې سره پای ته ورسېده.
