د پوهنې وزارت د پلټنې رئیس په رسمي سفر غزني ولایت ته لاړ
د پوهنې وزارت د پلټنې رئیس محترم قاري عتیق الله مؤذن غزني ولایت ته سفر وکړ او هلته یې د پوهنې له رئیس محترم الحاج مولوي میر نصیر احمد حسیني سره وکتل.
د غونډې په پیل کې، د غزني ولایت پوهنې رئیس پورته ذکر شوي پلاوي ته د ښه راغلاست ترڅنګ، د پوهنې وزارت د پلټنې ریاست له همکاریو څخه مننه څرګنده کړه.
ورپسې د پوهنې وزارت د پلټنې رئیس په خپله وینا کې وویل: ( هڅه کوي ترڅو ډاډ ترلاسه کړي، چې د خلکو حقونه تر پښو لاندې نه شي او د هر مستحق کس قانوني حقونه هغوی ته ورکړل شي).
نوموړي زیاته کړه چې، د پوهنې وزارت د پلټنې مدیریت په کارکوونکو سربېره، په پام کې لري چې د داخلي پلټنې، د مالي بلټنې قانون سره سم عمل کولو، تدارکاتو، خدماتو او توکو د اساسي اصولو په برخه کې د نورو اړوندو ادارو د ځینو کارکوونکو د مسلکي پوهاوي کچه لوړه کړي او د یادې موخه لپاره به په دې څانګو کې د وړتیا لوړولو څلور ورځنی سیمینار جوړ او ترسره شي.
د غونډې په پای کې، د غزني ولایت پوهنې رئیس د دغه سیمینار له ترسره کولو او د پلټنې ریاست د ټولو قانوني او مسلکي هڅو ملاتړ وکړ او د خپلې بشپړې همکارۍ ډاډ یې ورکړ.
