د پوهنې وزارت له بودیجې څخه په کونړ ولایت کې د ۷ تعلیمي مرکزونو بیارغونې پروژې بشپړې شوې
د کونړ ولایت په مرکز اسد آباد ښار او په څلورو نورو ولسوالیو کې ۲ بابه دیني مدرسې او ۵ بابه ښوونځي د پوهنې وزارت له عادي بودیجې څخه د ۴ مېلیونه ۲۴۴ زره افغانیو په لګښت تر بیارغولو وروسته ګټې اخیستنې ته وسپارل شول.
په دغو پروژو کې، د چپې درې ولسوالۍ د دیني مدرسې احاطوي دېوال، د ناړۍ ولسوالۍ دیني مدرسې بیارغونه، د چپې درې سیدور ښوونځي بیارغونه، د برکونړ ولسوالۍ د زاړه اسمار عالي لیسې بیارغونه، د سرکاڼو ولسوالۍ د مسلم آباد ښوونځي احاطوي دېوال، د شیګه ښوونځي احاطوي دېوال، او په مرکز اسد آباد ښار کې د فاطمي عالي لیسې بیارغونه شامله ده.
د پوهنې چارواکو په وینا، د یادو پروژو تر بشپړېدو وروسته، د زدهکوونکو لپاره مناسب، خوندي او معیاري تعلیمي چاپېریال برابر شوی دی.
