د پوهنې وزارت د اسنادو او اړیکو رئیس غزني ته سفر وکړ
د پوهنې وزارت د اسنادو او اړیکو رئیس محترم مولوي محمدرحیم ایوب له خپل مل پلاوي سره غزني ولایت ته سفر وکړ او هلته یې د پوهنې له مسوولینو سره د نویو ښوونکو د ګمارنې لارښود د پلي کېدو د څرنګوالي په اړه خبرې او بحث وکړ.
په یاده غونډه کې د پوهنې وزارت د اسنادو او اړیکو رئیس وویل: « ټاکل شوې چې د غزني ولایت په مرکز، دوو ولسوالیو او څلورو ښوونځیو کې د نویو ښوونکو د ګمارنې لارښود د پلي کېدو څرنګوالی له نږدې وارزول شي.»
نوموړي زیاته کړه، چې د ښوونکو د ګمارنې لارښود په سم او شفاف ډول پلي کېدنه به د دې زمینه برابره کړي، تر څو مسلکي، وړ او د اړوندو څانګو متخصص ښوونکي ښوونیزو مرکزونو ته جذب شي، چې ورسره به د تدریس کچه لوړه، د زدهکړو کیفیت ښه او زدهکوونکو ته به د معیاري زدهکړو زمینه لا زیاته برابره شي.
