د پوهنې وزارت سرپرست د ولایتونو له پوهنې رئیسانو سره وېډیویي کنفرانس دایر کړ
![12](/sites/default/files/2023-10/whatsapp_image_2023-10-19_at_9.57.27_am.jpeg)
د پوهنې وزارت سرپرست الحاج مولوي حبیب الله آغا، په داسې حال کې چې د یاد وزارت د مرکزي ادارو یو شمېر رئیسانو هم ګډون درلود، د ولایتونو له پوهنې رئیسانو سره یې د وېډیو کنفرانس له لارې د دغه وزارت د درۍ کلن کاري پلان په اړه هر اړخیزې خبرې او نظرونه تبادله کړل.
د پوهنې وزارت سرپرست د پوهنې له رئیسانو سره د وېډیویي کنفرانس په پیل کې خوښي وښوده او ویې ویل: نن هغه وخت را رسېدلی دی، چې په مرکز او ولایتونو کې د پوهنې د ودې او پرمختګ لپاره خپلې هڅې لا ګړندۍ کړو او په دې سره به د افغانستان.ا.ا. هغو آرمانونو ته چې موخه یې د هېواد ټولو بچیانو ته د متوازنو دیني او عصري زده کړو برابرول دي، ورسيږو.
نوموړي زیاته کړه، د پوهنې وزارت مشرتابه یو داسې پلان او چوکاټ چمتو کړی دی، چې په ترڅ کې به یې زمونږ د هېواد ټولې اړتیاوې پوره او د لویو پرمختګونو شاهدان به شو.
ورپسې د پوهنې وزارت د پلان او پالیسۍ رئیس مولوي حبیب الله اخندزاده هم د موضوع په اړه خبرې وکړې او زیاته یې کړه، د ولایتونو د ښوونیز وضعیت له تحلیل او د شته امکاناتو سره سم به د پوهنې وزارت درۍ کلن عملیاتي پلان پلی شي.
په ورته مهال، د ولایتونو پوهنې رئیسانو هم د موضوع په اړه خبرې وکړې او د پوهنې وزارت د درۍ کلن پلان د جوړولو په تړاو یې د یاد وزارت له مشرتابه څخه مننه او قدرداني وکړه.
د یادې ناستې په پای کې د ولایتونو پوهنې رئیسانو د خپلو مشرانو وړاندیزونه، نظریات او ستونزې د پوهنې وزارت له مسئولینو سره شریکې او د حل غوښتنه یې وکړه.
د پوهنې وزارت مشرتابه د دوی ستونزې او وړاندېزونه واورېدل او په حل کې یې د همکارۍ ژمنه وکړه.