له ولایتونو څخه د پوهنې خبرونو ته لنډه کتنه
لوګر
د لوګر ولایت د پوهنې دوستو دوو تنو هېوادوالو په خپل شخصي لګښت، د یاد ولایت مرکز پل علم ښار د حصارک لېسې لپاره د څښاک پاکو اوبو د یو څاه د کیندلو کارونه پیل کړل.
د مسئولینو په وینا، یاد څاه د سل زره افغانیو په لګښت سره د ۵۵ مترو په ژوروالي کیندل کیږي.
دایکنډي
د پوهنې یوه همکار بنسټ، د دایکنډي ولایت پوهنې ریاست سره په همغږۍ د سیمه ییزو او چټکو ټولګیو ۴۳۴ ښوونکو ته چې ۳۴۳ یې ښځې دي، د ظرفیت لوړونې درۍ ورځنی سیمینار دایر کړ.
د یاد سیمینار ګډون والو د نوي تدریسي مېتود، د زده کړې اساسات، د ټولګي د مدېریت تخنیکونه، د ښوونکو د درسي پلان ترتیب او د زده کوونکو د حفظ الصحې په برخو کې لازم معلومات ترلاسه کړل.
غزني
د غزني ولایت پوهنې رئیس الحاج مولوي میرنصیر احمد حسیني د یاد ریاست له آمرینو سره د لیدنې پر مهال د پوهنې ریاست د ستونزو او لاسته راوړنو د څېړلو ترڅنګ، د چارو د ښه والي او د ستونزو د حل په اړه نظرونه تبادله کړل
کابل
د کابل ولايت پوهنې رئيس مولوي عبدالحق حقاني د یاد ولايت د بګرامي ولسوالۍ د ديني مدارسو څلورنيم مياشتنیو آزموينیو څخه د څارنې ترڅنګ، د یادو آزموینو د پروسې پر روڼتیا ټینګار وکړ.
پکتیا
د پکتيا ولايت پوهنې رياست د سواد زده کړې عمومي مدېر چې د يادې ادارې د مشرتابه له لوري نوی ټاکل شوی، اړوندو کارکوونکو ته ور وپېژندل شو
