د پوهنې او مهاجرینو وزارتونو تر منځ د دوه اړخیزې همکاري د هوکړه لیک پر محتویاتو د کتنې غونډه ترسره شوه
د پوهنې او مهاجرینو وزارتونو تر منځ د هم غږي او متقابلې همکاري په موخه د ترسره کیدونکي هوکړه لیک پر محتویاتو د بحث او نظریاتو د تبادلې لپاره د یادو وزارتونو د استازو تر منځ غونډه ترسره شوه.
په یاده غونډه کې د پوهنې وزارت په استازیتوب د یاد وزارت د نصاب او ښوونکو د مسلکي پراختیا عمومي رئیس مولوي عبدالحکیم همت اخندزاده او د مهاجرینو د وزارت په استازیتوب د یاد وزارت د پلان رئیس مولوي محمود الحق احدي، د حقوقي حمایتي برخې رئیس قاري احمدالله هاشمي او د چارو د هم غږي مسئول سید جاوید هاشمي برخه درلوده.
غونډه د قرآن عظیم الشان د څو مبارکو آیاتونو په تلاوت سره پیل شوه، وروسته ښاغلي همت صاحب لومړی راغلیو میلمنو ته ښه راغلاست ووایه او د هوکړه لیک د اهمیت په اړه یې تفصیلې خبرې وکړې، نوموړي زیاته کړه چې یاد هوکړه لیک به د پوهنې او مهاجرینو وزارتونو تر منځ د هم غږي او دوه اړخیزې همکاري فضاء او په اړوندو چارو کې زیاتې اسانتیاوې را منځ ته کړي.
وروسته د هوکړه لیک متن ولوستل شو، ورپسې د هوکړه لیک پر منځپانګه بحث تر سره شو، دوه اړخیز نظریات تبادله او په ځینو برخو کې تعدیلات را منځ ته شول.
د یادونې وړ ده چې یاد هوکړه لیک به ډېر ژر د د دواړو وزارتونو تر منځ په رسمي ډول لاسلیک شي.
غونډه د دعائیې په لوستلو سره پای ته ورسیده.
